Malgre kriz politik ki ap brase bil peyi a, gen kèk aktivite kiltirèl ki ap òganize pou fen ane 2019 la. Festival Entènasyonal Literati Kreyòl (FEL Kreyòl) se youn ladan yo.
Soti 4 pou rive 8 desanm 2019, Ayiti ap resevwa Festival Entènasyonal Literati Kreyòl (FEL kreyòl). Se pou premye fwa ap gen yon festival konsa nan peyi a ; sa pa t ko janm fèt menm nan peyi ak rejyon ki pale kreyòl nan Karayib la.
Se ekriven epi powèt Ayisyen Manon Ejèn y ap onore lan edisyon festival sa a. Daprè responsab Regwoupman Ekriven Kreyòl (REK) yo, Anivince Jean Baptiste, chwa Manno a se yon bon chwa, paske Manno pase tout vi li ap ekri nan lang kreyòl la. Manno Ejèn di li kontan anpil paske yo chwazi onore li pou travay li yo. Fòk nou di ekriven an soti jis Kanada kote li ap viv pou l vin patisipe nan festival la.
Kiba ak Matinik se 2 peyi ki se envite espesyal pou ane a. Ekriven kiben Hilario Bastista Felix ak ekriven matinikè Yves Marie Seraline ki te dwe prezan nan eveneman p ap ka vini akoz klima sekirite peyi a ki pa fin bon. « Nou pa menm ka asire sekirite pa nou, alewè pou n ta asire sekirite etranje yo. Nou pa t vle pran ris fè yo antre nan peyi a, akoz kriz politik la », se sa inisyatè festival la, Anivince Jean Baptiste, di laprès nan yon konferans li t ap bay jou ki te madi 3 desanm 2019 la nan « Direction Nationale du Livre (DNL) ».
Ap gen anpil aktivite nan okazyon festival la, tankou : vant sinyati liv, konferans deba, ap gen yon fòmasyon sou ekriti pwezi epi ap gen you n sou kominikasyon kreyòl nan medya pou kèk jounalis.
Melisa Béralus, Gérard Marie Tardieu, Lyonel Trouillot, Jean Euphèle Milcé, Pierre Michel Chery, Gary Victor, Manno Ejèn, Jacques Adler Jean Pierre, Inema Jeudi, Michel Soukar, Jessica Nassaire, Saïka Céus, Iléus Papillon, Clotaire Saint-Natus, Billy Doré se non kèk ekriven ki ap gen pou siyen zèv yo nan festival la. Aktivite yo ap dewoule nan DNL, Jaden sanba, Sant kiltirèl pye poudre, Lakou Kangwa Twa zile, elatriye ; tout enstitisyon sa yo, ak lòt ankò, sipòte festival la.
Seremoni ofisyèl pou lanse festival la te fèt nan lokal « Café Tap-Tap » ki nan Tijo, jou ki te mèkredi 4 desanm 2019 la. Seremoni sa a te fèt an prezans prezidan Akademi Kreyòl Ayisyen an monsenyè Pierre André Pierre, envite ak reprezantan kèk lòt patenè takou Rektora inivèsite Leta Ayisyen an, fondasyon Maurice Sixto pou n site sa yo sèlman.
Molière ADELY est journaliste/redacteur à palmes Magazine. Il est également étudiant en sciences anthropologiques et sociologiques à l’Université d’État d’Haïti. Il collabore avec d’autres médias à Port-au-Prince. Il aime la culture et la politique. Il est aussi un passionné des nouvelles technologies de l’information et de la communication (NTIC)